Er veðurspám að hraka þrátt fyrir aukna tækni?

Hvers vegna er "sjóveðurspá" ekki lengur í veðurfregnum frá Veðurstofunni?  Sú spá gaf greinargóðar upplýsingar um hversu djúpar lægðir væru í kortunum o.þ.h.  Það er öllum hollt að þekkja aðeins inn á hvaða veður dynur yfir okkur ef lægð er 950 millibör (ég er af gamla skólanum) eða jafnvel enn dýpri.  Það verður mjög slæmt veður.  Ef mikill lausasnjór liggur yfir þegar slík lægð fer yfir má gera ráð fyrir miklum skafrenningi, með tilheyrandi ófærð og truflun á akstri bifreiða.

Ég tel að ekki sé hægt að gera veðurspár "neytendavænar" með því að tala bara almennt um veðrið í stað þess að gefa nánari upplýsingar um væntanlegt veðurlag.  Ef alltaf á að nota stóryrði þegar djúplægð er í kortunum,  er hætt við að fólk hætti smám saman að taka mark á slíkum spám.

Faðir minn var mikill veðuráhugamaður og ég erfði áhuga minn frá honum.  Nú finnst mér erfitt að verða mér úti um upplýsingar um veðurfar - til að ég geti sjálf áttað mig á hvað er í vændum í veðrinu.